កាលពីម្សិលមិញនេះ ថ្ងៃទី៤ ខែសីហា ឆ្នាំ២០២១ មានករណីមួយបានបង្កឲ្យមានការភ្ញាក់ផ្អើលពេញដងផ្លូវតែម្តង ខណៈសមត្ថកិច្ចមន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលក១ បានធ្វើការឃាត់ខ្លួនបុរសម្នាក់ដែលជាអ្នកដឹកឡេ បានលួចបង្កប់គ្រឿងញៀន នៅក្នុងកំប៉ុងឡេ។ ហេតុការណ៍នេះបានកើតឡើង ត្រង់ចំណុចស្ដុបចេនឡា ស្ថិតតាមបណ្ដោយផ្លូវម៉ៅសេទុង សង្កាត់ទួលស្វាយព្រៃ ខណ្ឌបឹងកេងកង រាជធានីភ្នំពេញ។
ក្នុងការចុះឆែកឆេរ និងឃាត់ខ្លួននេះ សមត្ថកិច្ចបានថតឲ្យឃើញស្តែងៗ នៅពេលយកដៃកាយចេញសាច់ឡេ ឃើញសុទ្ធតែគ្រឿងញៀនតែម្តង។
បើតាមសមត្ថកិច្ចនៅកន្លែងកើតហេតុ បានបញ្ជាក់ឲ្យដឹងថា កម្លាំងបានធ្វើការឃ្លាំមើលជនសង្ស័យ អស់រយៈពេលប៉ុន្មានខែមកហើយ ទើបឈានសម្រេចធ្វើការឃាត់ខ្លួននៅពេលនេះ។
ក្រោយធ្វើការឆែកឆេរ សមត្ថកិច្ចក៏បានបញ្ជូនខ្លួនជនសង្ស័យ ទៅកាន់ប៉ុស្តិ៍ប៉ូលីសភ្លាមៗផងដែរ ដើម្បីកសាងសំណុំរឿង ចាត់ការបន្តទៅតាមនីតិវិធីច្បាប់៕ រក្សាសិទ្ធិដោយ៖ លឹម ហុង
