ឯកឧត្តមជា វ៉ាន់ដេត រដ្ឋមន្ត្រីក្រសួងប្រៃសណីយ៍ ស្នើឱ្យលោក «Rattanak Mean» បញ្ជាក់ឱ្យបានច្បាស់ចំពោះខ្លឹមសាររបស់ខ្លួនដែលបង្ហោះរិះគន់មន្ត្រីនៅប្រៃសណីយ៍កម្ពុជា ដើម្បីកុំឱ្យមានការយល់ច្រឡំពីសាធារណជន។
ជាមួយគ្នានេះ ឆ្លើយតបនឹងការរិះគន់ទៅលើការផ្តល់សេវាកម្មបញ្ញើឥវ៉ាន់របស់ប្រៃសណីយ៍កម្ពុជា លោកដ្ឋមន្ត្រី បានគូសបញ្ជាក់ថា ក្នុងរយៈពេល ៤ ឆ្នាំចុងក្រោយនេះប្រៃសណីយ៍កម្ពុជា (Cambodia Post – CP) បានធ្វើការកែទម្រង់ផ្ទៃក្នុងលើប្រតិបត្តិការអាជីវកម្មរបស់ខ្លួនជាច្រើន ដើម្បីទទួលភាពជឿទុកចិត្តពីអតិថិជន និងចូលរួមចំណែកក្នុងការជំរុញការអភិវឌ្ឍពាណិជ្ជកម្ម តាមអនឡាញឱ្យកាន់តែសកម្ម។
ការលើកឡើងរបស់ ឯកឧត្តមរដ្ឋមន្រ្តី ជា វ៉ាន់ដេត ឆ្លើយអ្នកប្រើប្រាស់បណ្តាញសង្គមមួយរូប ដែលបានសរសេររិះគន់ទៅលើមន្រ្តីប្រៃសណីយ៍កម្ពុជា ដែលខ្លួនយល់ថា មន្រ្តីប្រៃសណីយ៍កម្ពុជា បម្រើសេវាកម្មអតិថិជនមិនបានល្អ និងមានបំណងគេងចំណេញលើខ្លួន។
អ្នកប្រើប្រាស់បណ្តាញសង្គមរូបនេះបានសរសេរយ៉ាងដូច្នេះថា «ទីនេះមានឈ្លើងទាមជាប់ប្រៃសណីយ៍កម្ពុជា ឈ្លើងកញ្ចាស់១ក្បាលនិងក្តិបឈ្លើង ២-៣ក្បាល ចាំជញ្ចក់ឈាមពលរដ្ឋ ,ឥវ៉ាន់តំលៃ ៥០-៦០ដុល្លារ វាគុណគូរចុះឡើង ឡើងតំលៃជិត១០០ដុល្លារ ចាប់បង់ពន្ធ៦១ដុល្លារ មុខវិញដូចចង់ហែកសាច់យើងស៊ីចឹង ម៉ូវសាហាវ មានក្តិបឈ្លើងមួយនោះ ដេញយើងឱ្យទៅរៀនច្បាប់ពន្ធគយទៀត កុំចេះសួរនាំវាផ្តេសផ្តាស យីមឹងៗ ចឹងបានរដ្ឋនេះស្គមខ្លាំងម្លេះ….ឈ្លើងច្រើនពេក អាសូរណាស់។ ពួកម៉ាក់ខំផ្ញើឥវ៉ាន់អោយប្រើ តែត្រូវឈ្លើងជញ្ជក់ម្តងជាពីរដង»។
ឆ្លើយតបបញ្ហានេះ លោក ជា វ៉ាន់ដេត បានគូសបញ្ជាក់ថា ក្នុងរយៈពេល ៤ ឆ្នាំចុងក្រោយនេះ «ប្រៃសណីយ៍កម្ពុជា បានធ្វើការកែទម្រង់ផ្ទៃក្នុងលើប្រតិបត្តិការអាជីវកម្មរបស់ខ្លួន ជាច្រើន រួមមាន៖
- ផ្លាស់ប្តូរវប្បធម៌ការងារ ចិត្តគំនិត និងអាកប្បកិរិយារបស់បុគ្គលិក ដោយផ្តោតសំខាន់លើការផ្តល់សេវាជូនអតិថិជន
- បង្កើនគុណភាពសេវាកម្ម ចាប់ពីការទទួលយករហូតដល់ការចែកចាយ
- ធ្វើបច្ចុប្បន្នភាព និងកែលំអបរិយាកាសការងារ ឱ្យកាន់តែល្អប្រសើរ ព្រមទាំងលើកកម្ពស់សុវត្ថិភាព និងសន្តិសុខ សម្រាប់ទាំងបុគ្គលិក និងសំបុត្រ/វត្ថុបញ្ញើរបស់អតិថិជន
- ពង្រឹងយន្តការបម្រើសេវាអតិថិជន (Customer Care) តាមប្រព័ន្ធអនឡាញ (Online) និងដោយផ្ទាល់ (Offline)។
ឯកឧត្តមបានបញ្ជាក់បន្ថែមថា តាមរយៈការកែទម្រង់ទាំងនេះ ប្រៃសណីយ៍កម្ពុជាបានទទួលភាពជឿទុកចិត្តកាន់តែខ្លាំងពីអតិថិជន ហើយក៏ទទួលបានការទទួលស្គាល់កម្រិតអន្តរជាតិជាច្រើន ដូចជា វិញ្ញាបនបត្រមាសស្តីពីការគ្រប់គ្រងគុណភាពសេវាកម្ម ឆ្នាំ២០២៤ និង វិញ្ញាបនបត្រមាសស្តីពីសន្តិសុខប្រៃសណីយ៍និងការគ្រប់គ្រងហានិភ័យគ្រោះមហន្តរាយ ឆ្នាំ២០២៥ របស់សហភាពប្រៃសណីយ៍សកល (UPU) និងពានរង្វាន់ Customer Care ជារៀងរាល់ឆ្នាំ ពី EMS Cooperative ជាដើម។
ឯកឧត្តមបន្ថែមថា «ក្រោមករដឹកនាំរបស់ខ្ញុំក្នុងវិស័យនេះ ខ្ញុំនឹងបន្តធ្វើឲ្យកាន់តែប្រសើថែមទៀត ដើម្បីចូលរួមចំណែកក្នុងការជំរុញការអភិវឌ្ឍពាណិជ្ជកម្ម តាមអនឡាញឱ្យកាន់តែសកម្ម»៕រក្សាសិទ្ធដោយ៖សុទ្ធលី
