លោកឧត្ដមសេនីយ៍ត្រី ប៉ុល វុទ្ធី ស្នងការរងខេត្តកំពង់ឆ្នាំងទទួលបន្ទុកការងារព្រហ្មទណ្ឌ បានអោយដឹងនៅព្រឹកថ្ងៃទី២៩ខែកញ្ញានេះថា សមត្ថកិច្ចនគរបាលស្រុករលាប្អៀរបានឃាត់ខ្លួន បុរសម្នាក់ដែលប្រើហឹង្សាលើកូនចុងបានហើយនៅព្រឹកនេះ ។
នៅថ្ងៃទី២៨ ខែកញ្ញា ឆ្នាំ២០២៦ វេលាម៉ោង១២:០៧ ឆ្នាំ នៅចំណុចបឹងដង្ខៅ ស្ថិតនៅក្នុងភូមិប៉ាហុី ឃុំអណ្ដូងស្នាយ ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង កើតមានករណី ហិង្សាដោយចេតនាមានស្ថានទម្ងន់ទោស (អំពើហិង្សាក្នុងគ្រួសារ) ដែលបង្កឡើងដោយជនសង្ស័យឈ្មោះ យន សាន ហៅ ញ៉ (ជាឪពុកចុង) បានវាយឈ្មោះ សាន ផានិត អាយុ១១ឆ្នាំ (ជាកូនចុង)ចំនួន១២ដៃ និងធាក់មួយជើងផ្ទុបទៅនិងដី មូលហេតុខឹងកូនយកគោទៅចងចោលរួចដើរកាប់ជន្លេន។
ក្រោយពេលកើតហេតុ កម្លាំងនគរបាលបានឃាត់ខ្លួនជនដៃដល់ កសាងសំណុំរឿងតាមនីតិវិធីបញ្ជូនទៅស្នងការដ្ឋាននគរបាលខេត្តកំពង់ឆ្នាំង។ ពេលនេះសមត្ថកិច្ចកំពុងសាកសួរដើម្បីចាត់ការតាមនិតិវិធីច្បាប់ ។
ការឃាត់ខ្លូនបុរសជាឪពុកចុងនេះបានកើតឡើងបន្ទាប់ពីមានវីដេអូមួយបានបង្ហោះលើបណ្ដាញសង្គមហ្វេសប៊ុកដោយបុរសរូបនេះបានប្រើហឹង្សាយ៉ាងព្រៃផ្សៃបំផុតមកលើកុមារាម្នាក់បណ្ដាលឱ្យមានការរិះគន់ខ្លាំងនៅលើបណ្ដាញសង្គមហ្វេសប៊ុក ។
សូមរំលឹកថា ករណីហិង្សាលើកុមារយ៉ាងព្រៃផ្សៃ៖ បុរសជាឪពុកចុងវាយតប់ និងធាក់កូនចុងកណ្តាលវាលស្រែ ធ្វើឱ្យមហាជនសម្តែងការក្តុកក្តួល និងអំពាវនាវឱ្យសមត្ថកិច្ចជួយអន្តរាគមន៍ជាបន្ទាន់
ខេត្តកំពង់ឆ្នាំង៖ វីដេអូឃ្លីបមួយកំពុងតែត្រូវបានចែកចាយ និងផ្សព្វផ្សាយយ៉ាងទូលំទូលាយនៅលើបណ្តាញសង្គម ដោយបានបង្ហាញពីសកម្មភាពអំពើហិង្សាក្នុងគ្រួសារយ៉ាងធ្ងន់ធ្ងរ និងអមនុស្សធម៌ ធ្វើឡើងដោយបុរសម្នាក់ជាឪពុកចុង ទៅលើក្មេងប្រុសតូចម្នាក់នៅកណ្តាលវាលស្រែ។
នៅក្នុងវីដេអូនោះ គេបានឃើញបុរសជាឪពុកចុង (មិនពាក់អាវ) បានធ្វើសកម្មភាពវាយដំ ធាក់ និងទះកំផ្លៀងទៅលើក្មេងប្រុសរងគ្រោះយ៉ាងព្រៃផ្សៃ នៅចំណុចវាលស្រែដែលមានហ្វូងគោ។ ទោះបីជាក្មេងប្រុសរងគ្រោះបានព្យាយាមរត់គេច និងលើកដៃសំពះសុំទោសជាច្រើនលើកច្រើនសារយ៉ាងណាក៏ដោយ ក៏បុរសរូបនោះនៅតែមិនព្រមឈប់ ដោយបានដេញតាមវាយធ្វើឱ្យក្មេងប្រុសដួលទៅលើដី និងថែមទាំងធាក់បន្ថែមទៀតយ៉ាងធ្ងន់ធ្ងរ។ ទោះជាមានអ្នកនៅក្បែរនោះបានព្យាយាមនិយាយឃាត់ឃាំងខ្លះៗយ៉ាងណាក៏ដោយ ក៏សកម្មភាពហិង្សានៅតែបន្តកើតឡើងដដែល។
អំពើហិង្សាលើកុមារខាងលើនេះ គឺជាការរំលោភបំពានយ៉ាងធ្ងន់ធ្ងរលើសិទ្ធិកុមារ និងជាអំពើល្មើសច្បាប់ដែលមិនអាចលើកលែងបានឡើយ។
ជុំវិញករណីនេះ មហាជន និងប្រជាពលរដ្ឋបានសម្តែងការក្តុកក្តួលជាខ្លាំង និងបានទទូចស្នើសុំយ៉ាងទទូចដល់អាជ្ញាធរមានសមត្ថកិច្ចក្នុងមូលដ្ឋាន ស្រុករលាប្អៀរ ខេត្តកំពង់ឆ្នាំង មេត្តាចុះស្រាវជ្រាវ និងធ្វើអន្តរាគមន៍ជាបន្ទាន់ ដើម្បីជួយសង្គ្រោះក្មេងប្រុសរងគ្រោះឱ្យផុតពីគ្រោះថ្នាក់ ព្រមទាំងចាត់វិធានការតាមផ្លូវច្បាប់ទៅលើជនបង្កឱ្យបានម៉ឺងម៉ាត់បំផុត៕រក្សាសិទ្ធដោយ៖សុទ្ធលី
