ថ្មីៗនេះ មហាជនក្នុងបណ្តាញសង្គម បានបញ្ចេញការរិះគន់ដូចព្យុះ ចំពោះគណៈកម្មការ ជាពិសេស «បាញ់» សំដៅទៅលើ Judge លោក ឆន សុវណ្ណរាជ ថាវិនិច្ច័យគ្មានភាពយុត្តិធម៌ លំអៀង ទៅលើបេក្ខជនម្នាក់ ដែលមហាជនសឹង៩៩% ទទួលស្គាល់ថាគាត់ពិតជាមានទឹកដមសំឡេងពិរោះ មិនគួរណាឲ្យធ្លាក់ទាល់សោះ។
គួរបញ្ជាក់ថា កាលពីរាត្រីថ្ងៃទី២៩ ខែឧសភា ឆ្នាំ២០២២ បេក្ខជនឈ្មោះ ទុំ សុវត្ថិ អាយុ២៦ឆ្នាំ មកពីខេត្តស្ទឹងត្រែង ធ្វើការផ្នែក Order នៅភោជនីយដ្ឋានមួយបានបង្ហាញវត្តមានក្នុងកម្មវិធី Cambodian Idol រដូវកាលទី៤ វគ្គ Judge Audition សប្តាហ៍ទី៤ ដោយបានលើកយកបទចម្រៀងមានចំណងជើង «ស្រឡាញ់ស្ទើរលេប» ដែលជាសំនៀងដើមរបស់លោក ណុប បាយ៉ារិទ្ធ មកបកស្រាយ។
ក្រោយបកស្រាយចប់ ភ្លាមៗ Judge សុខ ស៊ីឡាលីន បានផ្តល់យោបល់មុនគេថា ស្ដាប់ដំបូងអត់ដឹងពីចំណុចខ្លាំងរបស់ សុវត្ថិ ទេ ដល់ពេលស្ដាប់ចូល R ឃើញថា កម្លាំងសំឡេង ចង់និយាយថា ចេះថ្នមល្អ និងអាចរក្សារលកសំឡែងល្អមែនទែន ហើយដល់ពេលកន្លែងស្រែកទៀត គាត់ចេះទប់សំឡេងស្រែកអត់ឲ្យឮថ្លង់នោះទេ ហើយដង្ហើមវែង និងមានកម្លាំងទៀត។
ចំណែក ឱក សុគន្ធកញ្ញា បានលើកឡើងថា អ្វីដែលសុវត្ថិ បញ្ចេញមក គឺអត់មានភ្លាត់ស្នៀតកន្លែងណាទេ ធ្វើឲ្យចម្រៀង១បទនេះ ទៅរលូនល្អ ទាំងសំឡេងក្រោម និងសំឡេងតឹងៗខាងលើ។ តែទន្ទឹមនឹងនេះ កញ្ញា ថា សំឡេងរបស់សុវត្ថិ នៅមានចំណុចមួយ ដូចជារាងថប់ៗខាងក្រោយ អត់សូវថ្លា ប៉ុន្តែ បើមានពេលហ្វឹកហាត់ ស្វែងយល់ពីសំឡែងខ្លួនឯងបន្ថែមទៀតនឹងអាចធ្វើបាន។
ដោយឡែក ឆន សុវណ្ណរាជ បានវាយតម្លៃថា បទចម្រៀង១បទនេះ ការបកស្រាយ គឺទាមទារបច្ចេកទេសច្រើន ជាពិសេសនៅខាងក្រោម ណោតខាងក្រោមៗ ដែលពេលខ្លះស្តាប់ទៅ អត់ទាន់ទៅដល់កន្លែងទេ ពោលគឺកន្លែងខ្លះនៅរាងស្ទើរៗ។ តែទោះជាយ៉ាងណា តារាចម្រៀងរូបនេះថា សំឡេងរបស់ សុវត្ថិមានគុណភាពល្អហើយដោយគ្រាន់តែកន្លែងខ្លះរាងថប់ៗ ដែលអាចបណ្តាលមកពីសុខភាពមិនដឹង ឬទម្លាប់ច្រៀងពីដើមអុីចឹង។
រីឯម្ចាស់បទផ្ទាល់វិញ លោក ណុប បាយ៉ារិទ្ធ បានយល់ឃើញថា ការប្រើប្រាស់សំឡេងរបស់សុវត្ថិ នៅក្នុងចម្រៀងមួយបទនេះ មានភាពជាខ្លួនឯងច្រើនប៉ុន្តែកន្លែងខ្លះទៅជាស្រដៀង ឆន សុវណ្ណរាជ វិញ។ តែសរុបជារួមណុប បារ៉ារិទ្ធ ថា សម្រាប់ចម្រៀង១បទនេះ សុវត្ថិ មានចំណុចល្អច្រើន។
ក្រោយវាយតម្លៃចប់សព្វគ្រប់ សុខ ស៊ីឡាលីន ផ្ដល់ Yes, ឱក សុគន្ធកញ្ញា ឲ្យ No, ណុប បាយ៉ារិទ្ធិ ជាម្ចាស់បទឲ្យ Yes ខណៈ ឆន សុវណ្ណរាជ ដែលជាអ្នកសម្រេចចុងក្រោយ ឲ្យ No ។ ជាលទ្ធផល បេក្ខជនរូបនេះបានមិនអាចជាប់ទៅវគ្គបន្តបានទេ ព្រោះអ្នកជាប់ គឺទាល់តែទទួលបាន Yes ចាប់ពី៣ឡើងទៅ។ ពិតណាស់ ក្រោយ ឆនសុវណ្ណរាជ ផ្តល់ No ចុងក្រោយ បានធ្វើបេក្ខជនរូបនេះ ស្ទើរធ្លាក់ថ្លេីមក្ឌុក និងបានត្រឹមដើរត្រឡប់ទៅវិញយំឱបពិធីការិនីទាំងអារម្មណ៍សោកស្តាយជាខ្លាំង។
ដោយឡែក មហាជនក្រោយបានឃើញបែបនេះ បានផ្ទុះការរិះគន់ ចំអកឡកឡឺយដល់គណៈកម្មការ ពិសេសទៅដល់លោក ឆនសុវណ្ណរាជ កប់ៗថា «បងរាជគិតថា សំឡេងដូចគាត់ពេក គាត់ឲ្យធ្លាក់ គាត់ច្រៀងពីរោះណាស់, គាត់ច្រៀងពិរោះ ប្រៀបជាមួយអ្នកជាប់ៗ សំលេងគាត់មិនចាញ់គេទេ. ពាក្យNoពីបងរាជចុងក្រោយធ្វើអោយខ្ញុំខូចចិត្តណាស់ ស្រក់ទឹកភ្នែក, គណៈកម្មការទាំង៤ សុំស្ងើចសរសើរដល់កញ្ញា ឡាលីន និង បាយ៉ារិទ្ធ រាល់ការវិនិច្ឆ័យច្បាស់លាស់សុក្រឹត»។ រីមតិជាច្រើនទៀត បានបង្ហាញក្តីអាណិតទៅដល់បេក្ខជនរូបនេះ និងបញ្ចេញអារម្មណ៍ហួសចិត្តបំផុតថា «អាណិតណាស់ ច្រៀងពីរោះប៉ុណ្ណឹងហើយឲ្យគាត់ធ្លាក់ អ្នកជាប់ខ្លះច្រៀងមិនបានគាត់ផងឲ្យជាប់, ច្រៀងពិរោះឲ្យធ្លាក់ ស្អាតឲ្យជាប់ មិនយល់ទេ ថ្ងៃក្រោយ ដាក់ប្រឡង freshy ហ្មងទៅ,… »។
មិនចាំយូរ ក្រោយមតិមហាជនបាននាំគ្នារិះគន់ឡើងកក្រើក ស្រាប់តែសមីខ្លួនលោក ឆន សុវណ្ណរាជ បានបោះសម្តីទៅកាន់អ្នកទើសបែបនេះថា៖ «ម្សិលមិញរវល់ខ្លាំងណាស់អ្នកអើយ តែឆ្លៀតមក live កើបលុយជាមួយមេស្រីខ្ញុំ បានតែ៦ម៉ោង ក៏រត់ចោលគាត់ដោយសារតែ ធុរេន រឿងរ៉ាវព្យុះភ្លៀងសត្វសាហាវយ៉ាងណា ក៏ពូរាជ មិនចុះចាញ់តែមកចាញ់នឹងក្លិនធុរេនហ្នឹងតែម្តងស្បថ យកពេលវេលាដ៏មានតំលៃរបស់អ្នកមកគិតចេញជាលុយ កុំយកពេលវេលារបស់អ្នកទៅគិតចេញជាសំរាម ព្រោះខួរក្បាលយើងមិនមែនធុងសំរាមនោះទេ…»៕ រក្សាសិទ្ធិដោយ៖ លឹម ហុង
