ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងជាតំណាងដ៏ខ្ពង់ខ្ពស់រាជរដ្ឋាភិបាលកម្ពុជា បានគូសបញ្ជាក់ថា កម្ពុជា និងសាធារណរដ្ឋប្រជាមានិតប្រជាធិបតេយ្យកូរ៉េ នៅតែបន្តរក្សាទំនាក់ទំនងមិត្តភាពយ៉ាងរឹងមាំ ព្រមទាំងប្តេជ្ញាជំរុញបន្ថែមកិច្ចសហប្រតិបត្តិការល្អទាំងក្នុងក្របខណ្ឌទ្វេភាគី និងពហុភាគី ដើម្បីផលប្រយោជន៍រួមនៃប្រជាជនប្រទេសទាំងពីរ ក្រោមដំបូលសន្តិភាព ស្ថិរភាព និងវិបុលភាពរួមគ្នាក្នុងតំបន់។ ការលើកឡើងរបស់ឯកឧត្តមរដ្ឋមន្ត្រី បានធ្វើឡើងក្នុងឱកាសអញ្ជើញចូលរួមជាអធិបតីក្នុងពិធីអបអរសាទរខួបលើកទី ៧៨ នៃការបង្កើតសាធារណរដ្ឋប្រជាមានិតប្រជាធិបតេយ្យកូរ៉េ នាល្ងាចថ្ងៃទី៧ ខែកញ្ញា ឆ្នាំ២០២៦។ ពិធីនេះត្រូវបានរៀបចំឡើងនៅសណ្ឋាគារកាំបូឌីយ៉ាណា ដោយឯកឧត្តម PAK Chol Jun ភារធារីស្តីទី នៃស្ថានទូតសាធារណរដ្ឋប្រជាមានិតប្រជាធិបតេយ្យកូរ៉េ (DPRK) ប្រចាំព្រះរាជាណាចក្រកម្ពុជា។
ឯកឧត្តម ប៉ាក់ ឆុល ជុន (Pak Chol Jun) ភារធារីស្តីទីនៃស្ថានទូតកូរ៉េខាងជើង បានលើកឡើងពីមូលដ្ឋានប្រវត្តិសាស្ត្រនៃទំនាក់ទំនងរវាងកម្ពុជា និងកូរ៉េ ខាងជើង ដោយបញ្ជាក់ថា មិត្តភាពរវាងប្រទេសទាំងពីរត្រូវបានកសាងឡើងតាមរយៈទំនាក់ទំនងដ៏ជិតស្និទ្ធរវាងស្ថាបនិកសាធារណរដ្ឋប្រជាមានិតប្រជា ធិបតេយ្យកូរ៉េ អតីតប្រធានាធិបតី គីម អ៊ីល ស៊ុង និងព្រះករុណាព្រះបាទ សម្ដេចព្រះ នរោត្តម សីហនុ ព្រះបរមរតនកោដ្ឋ។
លោកបានលើកឡើងថា មិត្តភាពរវាងប្រទេសទាំងពីរ ដែលមានឫសគល់យ៉ាងរឹងមាំពីទំនាក់ទំនងដ៏ជិតស្និទ្ធរវាងមេដឹកនាំជំនាន់មុននៃប្រទេសទាំងពីរ បានអភិវឌ្ឍយ៉ាងល្អប្រសើរអស់រយៈពេលជាង ៦ ទសវត្សរ៍មកហើយ។
ឯកឧត្តម ប៉ាក់ ឆុល ជុន បានបញ្ជាក់ថា កូរ៉េខាងជើងនឹងបន្តថែរក្សាទំនាក់ទំនងជាប្រវត្តិសាស្ត្រ និងមិត្តភាពប្រពៃណីជាមួយកម្ពុជា ព្រមទាំងខិតខំពង្រីក និង
ពង្រឹងកិច្ចសហប្រតិបត្តិការរវាងប្រទេសទាំងពីរឱ្យកាន់តែទូលំទូលាយលើគ្រប់វិស័យ។
លោកក៏បានលើកឡើងថា កូរ៉េខាងជើងនឹងបន្តអភិវឌ្ឍទំនាក់ទំនងមិត្តភាពជាមួយបណ្តាប្រទេសដែលគោរពអធិបតេយ្យភាពរបស់ខ្លួន និងគាំទ្រសន្តិភាព ស្ថិរភាព និងវិបុលភាពរួម។
ជាមួយគ្នានេះ ឯកឧត្តមបានរំលេចអំពីការអភិវឌ្ឍផ្នែកនយោបាយ និងសេដ្ឋកិច្ចរបស់កូរ៉េខាងជើង ក្រោមការដឹកនាំរបស់លោក គីម អ៊ីល ស៊ុង លោក គីម ជុង អ៊ីល និងលោក គីម ជុង អ៊ុន ព្រមទាំងកិច្ចខិតខំប្រឹងប្រែងរបស់ប្រទេសនេះក្នុងការពង្រឹងសមត្ថភាពការពារជាតិ។
លោកបានឱ្យដឹងថា កូរ៉េខាងជើងកំពុងសម្រេចបាននូវសមិទ្ធផលសំខាន់ៗ ក្នុងការអនុវត្តភារកិច្ចដែលបានអនុម័តក្នុងមហាសន្និបាតលើកទី៩ នៃគណបក្ស ពលករកូរ៉េ ដែលបានប្រព្រឹត្តទៅកាលពីខែកុម្ភៈកន្លងទៅ។
ក្នុងនាមរាជរដ្ឋាភិបាលកម្ពុជា ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានសម្តែងការអបអរសាទរចំពោះរដ្ឋាភិបាល និងប្រជាជនកូរ៉េខាងជើង ក្នុង ឱកាសខួបលើកទី៧៨ នៃការបង្កើតសាធារណរដ្ឋប្រជាមានិតប្រជាធិបតេយ្យកូរ៉េ។
ឯកឧត្តមរដ្ឋមន្ត្រីបានគូសបញ្ជាក់ថា កម្ពុជា និងកូរ៉េខាងជើងបានរក្សាទំនាក់ទំនងដ៏យូរអង្វែង និងមិត្តភាពប្រពៃណី ដែលមានឫសគល់យ៉ាងជ្រៅពីទំនាក់ ទំនងដ៏ជិតស្និទ្ធរវាងព្រះករុណាព្រះបាទ សម្តេចព្រះ នរោត្តម សីហនុ និងអតីតសេនាប្រមុខ គីម អ៊ីល ស៊ុង៕ រក្សាសិទ្ធិដោយ ៖សុទ្ធលី
