ភ្នំពេញ៖ អំពើឃាតកម្មដ៏គួរឱ្យភ្ញាក់ផ្អើលមួយ បានកើតឡើងនៅខណ្ឌកំបូល រាជធានីភ្នំពេញ បន្ទាប់ពី ស្រ្តីម៉េម៉ាយ ម្នាក់ ដែលមានមុខរបរ ជាជាងសាឡន ត្រូវបានប្រទះឃើញដេកស្លាប់ យ៉ាង អាណោចអាធ័ម នៅក្នុងបន្ទប់ឡៅតឿនៃផ្ទះរបស់ខ្លួន ខណៈសមត្ថកិច្ចសង្ស័យថា បុរសដែលជាសង្សាររបស់នាង អាចជា ជនសង្ស័យ និង ជាអ្នកប្រព្រឹត្តអំពើឃាតកម្ម បន្ទាប់ពី បាន ប្លន់ យកគ្រឿងអលង្ការ និងម៉ូតូរបស់នាង រួចជិះគេចខ្លួនបាត់។
ហេតុការណ៍នេះ ត្រូវបានប្រទះឃើញនៅវេលាម៉ោងប្រមាណ ១២ថ្ងៃត្រង់ ថ្ងៃទី៧ ខែកញ្ញា ឆ្នាំ២០២៦ នៅចំណុចផ្ទះរបស់ជនរងគ្រោះ ស្ថិតក្នុងដីឡូតិ៍ច័ន្ទ សុវណ្ណ ភូមិកំបូល សង្កាត់កំបូល ខណ្ឌកំបូល រាជធានីភ្នំពេញ។
ជនរងគ្រោះត្រូវបានស្គាល់ឈ្មោះ ប្រាក់ ម៉ាលីស អាយុ៣៤ឆ្នាំ មុខរបរជាជាងសាឡន និងស្នាក់នៅក្នុងផ្ទះកើតហេតុខាងលើ។
រហូតមកដល់ពេលនេះ អត្តសញ្ញាណបុរសដែលសមត្ថកិច្ចសង្ស័យថា ជាជនដៃដល់មិនទាន់ត្រូវបានបញ្ជាក់ជាផ្លូវការនៅឡើយទេ។
តាមព័ត៌មានពីសមត្ថកិច្ច នារីរងគ្រោះជាស្ត្រីមេម៉ាយ និងមានកូនស្រីម្នាក់។
ទោះជាយ៉ាងណា កូនស្រីរបស់នាងមិនបានរស់នៅជាមួយម្តាយទេ ដោយបានទៅរស់នៅជាមួយជីដូនបង្កើត នៅក្នុងបុរីឡេង ណាវ៉ាត់ត្រា ស្ថិតក្នុងភូមិស្នួលខ្ពស់ សង្កាត់កំបូល ខណ្ឌកំបូល។
ប្រភពដដែលបានឱ្យដឹងថា នារីរងគ្រោះបានមានទំនាក់ទំនងស្នេហាជាមួយបុរសដែលត្រូវបានសង្ស័យថា ជាឃាតករអស់រយៈពេលជាងមួយឆ្នាំមកហើយ។
អ្នកទាំងពីរតែងតែមានទំនាក់ទំនង និង ស្គាល់គ្នាជិតស្និទ្ធ ហើយនៅយប់មុនពេលសាកសពត្រូវបានប្រទះឃើញ ស្លាប់ បុរសជាសង្សាររូបនេះក៏បានស្នាក់នៅជាមួយនារីរងគ្រោះនៅក្នុងផ្ទះកើតហេតុផងដែរ។
តាមការពិនិត្យបឋមរបស់សមត្ថកិច្ចជំនាញ ស្រ្តីរងគ្រោះត្រូវបានសង្ស័យថា បានស្លាប់ដោយសារការថប់ដង្ហើម និងការច្របាច់ក។
សមត្ថកិច្ចសង្ស័យថា ជនដៃដល់អាចបានយកខ្នើយខ្ទប់មុខនារីរងគ្រោះ និងច្របាច់ករហូតដល់បាត់បង់ជីវិត។
ក្រោយពី ស្រ្តីរងគ្រោះស្លាប់ ជនសង្ស័យត្រូវបានសង្ស័យថា បានយកគ្រឿងអលង្ការមួយចំនួនរបស់នាង ព្រមទាំងម៉ូតូម៉ាក Honda Click មួយគ្រឿង រួចជិះចេញពីកន្លែងកើតហេតុ និងគេចខ្លួនបាត់។
សមត្ថកិច្ចកំពុងផ្តោតការស្រាវជ្រាវទៅលើបុរសដែលមានទំនាក់ទំនងស្នេហាជាមួយនារីរងគ្រោះ ជាពិសេសដោយសារតែគេត្រូវបានរាយការណ៍ថា បានស្នាក់នៅជាមួយនាងនៅយប់មុនពេលកើតហេតុ។
បច្ចុប្បន្ននេះ កម្លាំងសមត្ថកិច្ចជំនាញកំពុងបន្តប្រមូលព័ត៌មាន ស្រាវជ្រាវវត្ថុតាង និងតាមដានតម្រុយពាក់ព័ន្ធ ដើម្បីកំណត់អត្តសញ្ញាណ និងស្វែងរកទីតាំងជនសង្ស័យ ដើម្បីឈានទៅតាមចាប់ខ្លួនយកមកសាកសួរ និងចាត់ការតាមនីតិវិធីច្បាប់។រក្សាសិទ្ធិគ្រប់យ៉ាងដោយ CEN
