ភ្នំពេញ៖ ឯកឧត្ដម ឃួង ស្រេង សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជារាជធានីភ្នំពេញ បានណែនាំឱ្យអាជ្ញាធរខណ្ឌ សង្កាត់ ត្រូវបំរើប្រជាពលរដ្ឋឱ្យគ្រប់ជ្រុងជ្រោយ ទាំងជីវភាព ទាំងការរក្សាសន្តិសុខ សណ្តាប់ធ្នាប់ ត្រូវចុះមើលលូ ប្រឡាយ និងផ្លូវជាដើមដើម្បីឱ្យប្រជាពលរដ្ឋបានជំនឿទុកចិត្ត គោរពស្រលាញ់ ហើយបោះឆ្នោតជូនគណបក្សប្រជាជនកម្ពុជាបន្តទៀត។
ការណែនាំបែបនេះរបស់ ឯកឧត្ដមឃួង ស្រេង បានធ្វើឡើងក្នុងពិធីសំណេះសំណាលជាមួយសមាជិក សមាជិកាគណៈកម្មាធិការគណបក្សសង្កាត់ទួលស្វាយព្រៃទី១ និងសង្កាត់ ទួលស្វាយព្រៃទី២ ខណ្ឌបឹងកេងកង នៅក្រោយបញ្ចប់ម៉ោងរដ្ឋបាល នាល្ងាចថ្ងៃទី២២ ខែកក្កដា ឆ្នាំ២០២៦នេះ។
ឯកឧត្ដម ឃួង ស្រេង បានណែនាំដល់អាជ្ញាធរខណ្ឌ ចៅសង្កាត់ សូមមើលថែ និងក្តាប់ឱ្យបានក្នុងករណីបងប្អូនប្រជាពលរដ្ឋមានជីវភាពខ្វះខាត ឬគ្មានលទ្ធភាពបូជាសព គ្មានក្តាម្ឈូស ជាដើម គឺរដ្ឋបាល រាជធានីភ្នំពេញ នឹងផ្តល់ធានារ៉ាប់រងចំណាយជូន ហេីយបងប្អូនប្រជាពលរដ្ឋដែលខ្វះខាតអាចទាក់ទង មកអាជ្ញាធរមូលដ្ឋាន សង្កាត់ ឬរដ្ឋបាលខណ្ឌ ដែលនៅជិតបំផុត។ ការផ្តល់ជូនបែបនេះគឺកុសលផលបុណ្យធំណាស់។
ឯកឧត្ដមឃួង ស្រេង បានបន្តទៀតថា៖ ដេីម្បីរក្សាបាននូវប្រជាប្រិយភាព និងបន្តទទួលបានការគាំទ្រពីប្រជាពលរដ្ឋដែលជាម្ចាស់ឆ្នោត យេីងត្រូវពង្រឹងចំណុចខ្វះខាតរបស់យេីង ពិសេសលេីការផ្តល់សេវាសាធារណៈផ្សេងៗជូនប្រជាពលរដ្ឋឱ្យកាន់តែល្អប្រសើរ។ ឯកឧត្ដមបានបន្តទៀតថា គណបក្សប្រជាជនកម្ពុជាត្រូវទទួលបានជ័យជម្នះបន្តទៀត និងជារៀងរហូត។ គ្មានបក្សណាមួយ មានសមត្ថភាព ការពារសន្តិភាពបានដូចគណបក្សប្រជាជនកម្ពុជានោះទេ។
ឯកឧត្ដមឃួង ស្រេង បានបន្តទៀតថា៖ សម្តេចតេជោ ហ៊ុន សែន និងសម្ដេចធិបតីហ៊ុន ម៉ាណែត នាយករដ្ឋមន្ត្រីរដ្ឋមន្ត្រី បានអភិវឌ្ឍន៍ប្រទេសជាតិឱ្យរីកចំរើន លើគ្រប់វិស័យ និងបានប្តេជ្ញាចិត្តយ៉ាងដាច់ខាតក្នុងកិច្ចការពារបូរណៈភាពទឹកដី មិនឱ្យបាត់បង់ឡើយ។ ដូច្នេះក្នុងនាមអាជ្ញាធរ ត្រូវយកអ្វីៗទាំងនេះទៅផ្សព្វផ្សាយឱ្យប្រជាពលរដ្ឋបានយល់ជ្រោតជ្រាបឱ្យកាន់តែច្បាស់ ដើម្បីឱ្យពួកគាត់បន្តគាំទ្រ និងបោះឆ្នោតជូនគណបក្សប្រជាជនកម្ពុជា យកជ័យជំនៈនៅឆ្នាំ២០២៧ និងឆ្នាំ២០២៨បន្តទៀត។
ក្នុងឱកាសនោះដែរ ទាំងចៅសង្កាត់និងមេភូមិនីមួយៗ បានលើកឡើងពីសមិទ្ធផលនានារបស់បក្សដែលសម្រេចបាន ជាមួយនិងការលើកឡើងពីផែនការសកម្មភាពដែលបាន និងកំពុងអនុវត្ត ដូចជា ការខិតខំកសាងសមាជិកបក្ស ការរក្សាសន្តិសុខសណ្តាប់ធ្នាប់ជូនប្រជាពលរដ្ឋនៅក្នុងមូលដ្ឋាន ជាដើម។ បន្ថែមពីនេះក៏បានលើកឡើងពីសន្តិអារម្មណ៍របស់ប្រជាពលរដ្ឋនៅក្នុងមូលដ្ឋាន ដែលគាំទ្រយ៉ាងពេញទំហឹងចំពោះចំណាត់ការនានា របស់សម្តេចតេជោ ហ៊ុន សែន និងសម្ដេចធិបតីហ៊ុន ម៉ាណែត នាយករដ្ឋមន្ត្រីរដ្ឋមន្ត្រី ក្នុងវិវាទព្រំដែនកម្ពុជា-ថៃនិងការធ្វើពហិការមិនប្រើប្រាស់ទំនិញរបស់ថៃ៕ រក្សាសិទ្ធិដោយ៖សុទ្ធលី
